Cort Internacional de Chusticia

A Cort Internacional de Chusticia (CICh) u Tribunal Internacional de Chusticia (TICh), conoixida coloquialment como Cort Mundial, ye l'organo chudicial principal d'as Nacions Unidas. Establida en 1946, as suyas funcions principals son resolver os pleitos entre os estaus y dar opinions y consellos en cuestions legals presentadas por l'Asamblea Cheneral y o Consello de Seguridat d'as Nacions Unidas, u por achencias especializadas que tienen l'autorización d'os dos organos d'a ONU. O Estatuto d'a Cort Internacional de Chusticia ye o principal documento constitucional que regula las actividaz d'a Cort.

A seu d'a Cort se troba en a ciudat de Den Haag, en os Países Baixos. Ye formada por quince chueces esleyius por l'Asamblea Cheneral d'a ONU y por o Consello de Seguridat d'a ONU d'una lista de personas seleccionadas por grupos nacionals d'a Cort Permanent d'Arbitrache. Os chueces treballan por un periodo de nueu anyos y pueden ser reesleyius. No pueden ser esleyius dos chueces d'o mesmo estau. Un tercio d'a Cort ye esviellada cada tres anyos. Cadagún d'os miembros permanents d'o Consello de Seguridat siempre tiene un chuez en a Cort. As cuestions que se presentan a la Cort se resuelven por mayoría d'os chueces presents. L'articlo 38 d'o estatuto diz que ta plegar a una decisión, a Cort ha d'emplegar as convencions internacionals, a tradición internacional y os prencipios chenerals d'a lei reconoixius por as nacions civilizadas. Os chueces pueden emplegar decisions chudicials previas ta interpretar a lei, encara que a Cort no ye subchecta a las suyas decisions previas. Si as partis son d'alcuerdo, a Cort puet decidir ex aequo et bono, (en chusticia y igualdat), lo que significa que as decisions son basadas en os prencipios chenerals d'igualdat y no pas en una lei especifica.